एकाच वेळेस खरेदीखत आणि ताबा साठेखत
५०.
एकाच वेळेस खरेदीखत आणि ताबा साठेखत :
वाचा : भारतीय नोंदणी कायदा, कलम १७ ; महाराष्ट्र जमीन महसूल अधिनियम १९६६, कलम १४९ व १५० ; मालमत्ता हस्तांतरण कायदा १८८२, कलम ५४.
मधुकररावांनी
स्वत:च्या
मालकी हक्काच्‍या शेतजमिनीचे नोंदणीकृत खरेदीखत मारूतीला करून दिले. नंतर त्‍याच
महिन्‍यात त्‍यांनी त्‍याच शेतजमिनीचे नोंदणीकृत ताबा साठेखत शंकरला करून दिले. पुढील महिन्‍यात नोंदणी कार्यालयातून या दोन्‍ही
व्यवहाराची कागदपत्रे प्राप्त झाल्यानंतर तलाठी भाऊसाहेबांनी गाव नमुना ६ मध्ये त्याची
नोंद घेतली. सर्व
हितसंबंधीतांना नोटीस बजावली. परंतु पुढे मंडलअधिकारी याबाबत काय निर्णय घेणार याची उत्‍सुकता
त्‍यांना होती.
सर्व हितसंबंधीत हजर राहिल्यानंतर
तलाठी भाऊसाहेबांनी त्या सर्वांची संमतीदर्शक स्वाक्षरी नोटीस पुस्तकावर घेतली.
मुदत कालावधी संपल्‍यानंतर
मंडलअधिकारी यांनी संबंधीत फेरफारवर निर्णय देण्‍याकामी कागदपत्रे पाहिली आणि
निर्णय दिला की,
सदर मिळकतीच्‍या नोंदणीकृत
खरेदीखताचा दस्त आधी झालेला आहे. त्‍यामुळे ज्‍या क्षणाला खरेदी दस्त झाला त्या
क्षणापासून, सदर मिळकतीवरील मधुकररावांचा मालकी हक्‍क मारुतीच्‍या नावे हस्‍तांतरीत
झाला आहे. त्‍यामुळे मधुकररावांचे नाव कमी करुन मारूतीचे नाव कब्‍जेदार सदरी नोंदविण्‍यात
यावे. मारूतीच्‍या नावे मालकी हक्‍क हस्‍तांतरीत झाल्‍यामुळे सदर शेतजमिनीवर मधुकररावांचा
मालकी हक्‍क नाही. त्‍यामुळे मधुकररावांना ती शेतजमीन शंकरला नोंदणीकृत ताबा
साठेखतानुसार देण्‍याचा अधिकार प्राप्त होत नाही. मधुकरराव आणि शंकर यांच्‍यातील ताबा
साठेखताचा दस्त बेकायदेशीर ठरत असल्‍यामुळे ताबा साठेखताची सदर नोंद रद्‍द करण्‍यात
येत आहे.
Comments